Sarpur | Plögg RSS feed for this section

Þetta er plata ársins

19 Okt

xstud-poster
Í dag er mikið Samfó-skrall á Bryggjunni brugghúsi. Boðið verður upp á skemmtiatriði (sjá plaggat). Um að gera að mæta, finna ferska kratavinda leika um heilabúið og sannfærast um að Ísland getur alveg tileinkað sér góða hluti sem hafa gefist vel í Kanada, Svíþjóð og öðrum löndum sem við ættum að bera okkur saman við. Jafnarmennskan virkar, þótt Blair-isminn hafi alveg fokkað þessu upp um tíma. X-S í dag er með best skúruðu framboðslistana og eins og skoðunarkannanir hafa verið að sýna er þetta málið í dag og það sem koma skal. Ísland úr ruslflokki íhaldsins, takk. Löngu kominn tími til að ríku kallarnir ráði ekki öllu hérna.

Páll_Ivan_frá_Eiðum_-_This_Is_My_Shit_600_600
Páll Ivan frá Eiðum á plötu ársins 2016 og 2017, This is my shit. Ég (Erðanúmúsík) var svakaspenntur fyrir að gefa þetta út á CD í janúar í fyrra. Það fór af stað, Páll valdi lögin, Albert Finnbogason masteraði plötuna og Páll fór að hugsa um hvað platan ætti að heita. Svo hlýt ég að hafa dottið í eitthvað þunglyndislegt verkleysi því mánuðir liðu og ekkert gerðist – Páll er sjálfur meira og minna í þunglyndi, svo ekki var mikið ýtt á eftir þessu úr þeirri áttinni. Listamiðstöðin og plötuútgáfan Mengi kom svo í spilið og vildi gefa plötuna út. Það tók endalausa mánuði, en núna, skilst mér, er This is my Shit, fyrsta plata Páls Ivans loksins komin út. Hallelúja! Þú verður nú bara að heyra þessa plötu, því hún er besta plata ársins, bæði 2016 og 2017. Nettari verður poppskíturinn varla. Afhverju er Tinder on the Toilet í massaspilun á öllum útvarpsrásum? Eru þessir útvarpsmenn algjörir þöngulhausar?
Brakandi ferskur vinýll ætti að vera til út í búð og svo er This is my shit á Spotify.

ABBABABB! – Prumpulagið 20 ára

13 Okt

sedogheyrt-skapti
Í dag eru liðin 20 ár síðan Abbababb! með Dr. Gunna & vinum hans kom út. Að því tilefni fer fram afhending gullplötu (5000 eintök seld) í Smekkleysu plötubúð, Laugavegi 35. Giggið byrjar kl. 16:00.

Abbababb! var tekin upp um sumarið 1997 af Valgeiri Sigurðssyni í Gróðurhúsinu, sem þá var glænýtt í iðnaðarhúsnæði í Smiðjuhverfi, Kópavogi. Þetta var fyrsta platan sem tekin var upp í Gróðurhúsinu. Auk Valgeirs var Birgir Baldursson helsti hjálparkokkurinn við gerð plötunnar. Hann trommaði og hjálpaði til við útsetningar og pælingar. Heiða Eiríksdóttir var heldur aldrei langt undan með söng og ráðleggingar – og samdi auk þess hið tregafulla lokalag, “Kisa mín”.

Mikill gestagangur er á Abbababb! Í upphafi var Jakobi Frímanni Magnússyni boðið að vera Hr. Rokk og leika hlutverkið með “Út á stoppustöð”-röddinni. Hann hafnaði boðinu og hefur síðar sagt að það séu hans stærstu listrænu mistök á ferlinum. Í staðinn var Rúnar Júlíusson kallaður til, en hann hafði áður gert gott mót í laginu “Hann mun aldrei gleym’enni” með unun. Rúnar tók Hr. Rokk svo óaðfinnanlega að hann var allar götur síðar kallaður Hr. Rokk.

Magga Stína spilaði á fiðlu og söng bakraddir og aðalrödd í “Strákurinn með skeggið”. Páll Óskar kíkti inn og söng “Dodda draug”, en það lag er eftir Paul Caporino úr bandarísku pönkhljómsveitinni MOTO, sem spilaði með Bless í USA 1990. Skapti Ólafsson var rifinn í stúdíó í fyrsta skipti síðan 1958 og söng í “Lalla-laginu” með Steini, syni sínum.

Dr. Gunni gat lítið fylgt plötunni eftir, enda í hörkumeiki með unun í útlöndum, eða í ástarmóki með nýrri kærustu í Bandaríkjunum. Einhver gigg voru þó tekin fyrir jólin 1997, meðal annars á uppskeruhátíð tímaritsins Æskunnar, þar sem Magnús Scheving kom einnig fram á frumdögum Íþróttaálfsins.

Pall Oscar Abbababb

Strax fór að bera á miklum vinsældum “Prumpulagsins”. Gunni hafði beðið Jón Gnarr að semja texta um prump og annan til. Niðurstaðan voru lögin “Óli Hundaóli” og “Prumpufólkið” – eða “Prumpulagið”, eins og gáfulegra hefði verið að kalla lagið. Árni Sveinsson gerði myndband við lagið, sem sló í gegn. Þarna fyrir jólin 1997 lá því prumpuský yfir landinu og ballsveitir hömuðust við að spila lagið á böllum. Krakkar víðsvegar voru með prump á heilanum og sögur bárust um siðavandar leikstjórastýrur sem hreinlega bönnuðu lagið – og jafnvel plötuna alla – á sínum leikskóla.

Abbababb! Seldist í 4000 eintökum fyrir jólin 1997 en önnur þúsund eintök hafa mjatlast út á þeim 20 árum sem liðin eru. Lengi lifir svo í góðu prumpi, eins og ég er reglulega minntur á á götum úti. Það þekkir hvert íslenskt mannsbarn Prumpulagið, enda er prump fyrsti brandari mannkynsins og líklega sá besti.

Eins og áður segir fer afhending gullplötunnar fram kl. 16 í dag, föstudaginn 13. okt – í Smekkleysu plötubúð, Laugavegi 35. Allir eru velkomnir til að samfagna, sérstaklega þeim sem finnst prump fyndið – og hverjum finnst það nú ekki?

DV-JAJ

Pönk til Akureyrar

10 Okt

Það styttist í stórafmælin. ABBABABB! og Prumpulagið verður 20 ára nk. föstudag, 13. október. Að því tilefni fer fram gullplötuafhending og tónlistarflutningur í Smekkleysu plötubúð kl. 16 sama dag (föstudaginn 13.  okt). Allir velkomnir. Komið með krakkana!

Í janúar 2018 verða liðin 30 ár síðan GOÐ með S.H.Draumi kom út. Því verður fagnað en nánar auglýst síðar.

Það sem má hinsvegar auglýsa núna er að Dr. Gunni leikur á Græna hattinum, Akureyri, fimmtudagskvöldið 26. október. Í bandinu eru auk mín þeir Birgir Baldursson (lang besti trommari á landinu), Grímur Atlason kenndur við Airwaves og nýjasti meðlimurinn, Valtýr Björn Thors. Æfingar eru hafnar og þetta verður vonandi þétt og kraftmikið. Á efnisskránni verða bestu lögin frá og með Bensín skrímslið skríður með S.H.Draumi. Hljómsveitin LOST með þeim Rögga gáfaða og Kristjáni Pétri hitar upp. Þetta verður algjörlega meiriháttar og miðasala er hafin.

Poppsagan á DVD!

18 Des

15418351_953819338051894_3246524175458615467_o

Allir þættirnir 12 fást nú saman á þremur dvd – glæsipakki sem er til sölu á eftirtöldum útsölustöðum: Heimkaupum (frí heimsending), Hagkaupum, Penninn-Eymundsson, Lucky Records, Smekkleysa Plötubúð og Tólf tónum. Skyldueign á hvert menningarheimili!

Á degi íslenskrar tónlistar

1 Des

fullveldispunk2
Á degi íslenskrar tónlistar bendi ég á Fullveldispönk! í Hard Rock Café í kvöld. Við erum að tala um tvöfalt kombakk Jonee Jonee og Tappa tíkarrass, klassískt popppönk Fræbbblanna og nýrokk Suðs. Verður gjörveikt. Allir eru til í tuskið og bátana og hér má sjá Jonee Jonee æfa sig á dögunum. MIÐASALA Á MIÐI.IS

******

Á degi íslenskrar tónlistar bendi ég á Karolínusöfnun Heiðu og plötuna hennar FAST. 

******

Á degi íslenskrar tónlistar bendi ég á að 12 þátta-röðin Popp og rokksaga Íslands er enn í forsölu á 5000 kall hér. 3ja diska DVD-pakki er væntanlegur á næstu dögum. Pantið hér.

Tappi tíkarrass snýr aftur!

29 Nóv

tappi-eythor
Það hryggir Pönksafnið að tilkynna að vegna hjartaþræðingar Árna Daníels Júlíussonar munu bæði Taugadeildin og Q4U detta út úr áður auglýstri dagskrá Fullveldispönks!-tónleikana sem fara fram í Hard Rock Cafe nú á fimmtudagskvöldið 1. des. Pönksafnið óskar Árna góðs bata og vonast til að geta boðið upp á eðalböndin Q4U og Taugadeildina snemma á næsta ári.

Í staðinn munu hljómsveitirnar Suð og Tappi tíkarrass (!) koma fram. 

Suð er rokktríó sem sendi frá sér sína aðra plötu á dögunum – Meira suð – og er verðugur fulltrúi „ungu kynslóðarinnar“ á tónleikunum. Tappa tíkarrass þarf vart að kynna, en það er hljómsveitin sem Björk sleit unglingaskónum með og sló í gegn í Rokki í Reykjavík. Björk verður reyndar ekki með að þessu sinni, enda bara fáanleg í stafrænni þrívídd þessa dagana, og því mun upprunalegur söngvari Tappans, Eyþór Arnalds, sjá um söng og leikræn tilþrif. Þetta verða fyrstu tónleikar Tappa tíkarrass síðan hljómsveitin spilaði síðast í Safarí 1985.

Tónleikarnir 1. des hefjast kl. 22, en húsið verður opnað hálftíma fyrr. Dagskráin er eftirfarandi:
Fræbbblarnir 22:00 – 22:30
Suð 22:40 – 23:00
Tappi tíkarrass (í fyrsta skipti síðan 1985!) 23:10 – 23:40
Jonee Jonee (í fyrsta skipti síðan 1982!) 23:50 – 00:30

Miðasala er á midi.is og það kostar einungis 2000 krónur inn.

Skór prinsessunar

27 Nóv

2016-11-27-00-26-31
Tónleikar Leoncie heppnuðust glæsilega í gærkvöldi. Allir yfirgáfu svæðið með bros á vör eftir maraþon-prógramm prinsessunar sem keyrði í alla hittarana auk nýs efnis, eins og „Mr. Lusty“, sem mun von bráðar toppa alla vinsældarlista.

Þá er að snúa sér að næstu tónleikum: Pönksafn Íslands kynnir: Fullveldispönk! á Hard Rock næsta fimmtudag, 1. des. Fjögur flaggskip úr pönkinu; Fræbbblarnir, Taugadeildin og Q4U, að ógleymdu tríóinu Jonee Jonee, sem nú snýr aftur í fyrsta skipti á tónleikum síðan 1982! Miðasala hafin hér. Algjört möst og unaður.


Ég vek athygli á Karólínu-söfnun HEIÐU sem nú er að safna fyrir útgáfu plötunnar FAST á vinýl. Góð plata og þarft málefni – Allir með!